Batafsil fotoretsept: Uy sharoitida tayyorlanilgan lapsha
Masalliqlar:
-
2 ta tuxum
-
yarim choy qoshiq tuz
-
200 gramm un
Yo’nalishlar
Juda mazali tuxumli lapshalarni uy sharoitida tayyorlash juda oson bo’lib, asosiysi bunga xohish bo’lsa bas, kerakli masalliqlar esa hammaning ro’zg’oridan topilishi aniq.
Agarda siz hali birinchi bor tayyorlayotgan bo’lsangiz ham, xavotir olmang, albatta uddalaysiz. Bizning ko’rsatmalarga yaxshilab ahamiyat bering va yangicha taom tayyorlang, ko’rasiz oila a’zolaringiz bundan juda quvonishadi.
Tayyorlaniladigan yegulikka taxminan 4 000 so’m sarflaniladi.*
*narxi manba chop etilgan vaqtgagina amal qiladi.
Kerakli masalliqlarni tayyorlab olamiz.
Tog'orachaga unni solib, o'rtasini chuqurcha qilib olamiz. Tuxumlarni alohida idishga chaqib solamiz va tuz sepib aralashtiramiz. Unning ustidan solamiz.
Qattiq xamir qorib olamiz. Xamirning qattiq bo'lishi bu me'yoriy holat. Xamirni uzoq, taxminan 10-15 daqiqa yaxshilab qorish kerak bo'ladi.
Xamirni ustini oziq-ovqat pelyonkasi bilan yopamiz va 25 daqiqaga tindirib qo'yamiz. Undan so'ng xamirni olib, yana mushtlaymiz. Xamir biroz yumshaydi va elastik holatga kiradi.
Xamirni olib, teng ikkiga bo'lamiz.
Xamirning ikkita bo'lagini ham alohida-alohida yupqa yoyib olamiz, taxminan 1 mm yupqalikda. Xamirni ostidan kaftingizni qo'ysangiz, u ko'rinib turishi kerak.
Aylana shakldagi yoyilgan xamirni qog'oz sochiq ustiga qo'yib, xona haroratida 30-40 daqiqa davomida quritamiz. Ammo juda qurib ham ketmasin, chetlari biroz qurib qolsa yetarli.
So'ng xamir ustiga ozroq un sepamiz va uni avval teng ikki buklaymiz, so'ng yana ikkiga, ozroq undan sepib, yana bir buklasak ko'p qavatli uchburchak shakl hosil bo'ladi.
Endi o'tkirroq pichoq bilan lapshaning chetki qismidan uchiga qaratib, yupqa qilib kesib chiqing. Lapsha qanchalik yupqa bo'lsa, shunchalik shirin chiqadi deyishadi.
Kesilgan lapshalarni taxtakach yoki stol ustiga terib, xona haroratida yarim kun davomida quritamiz. Ahamiyat bering, quritadigan xonada yelvizak(skvoznyak) bo'lmasligi kerak.
So'ng tayyor lapshalarni bankalarga solib saqlaymiz yoki qaynatib iste'mol qilamiz. Yoqimli ishatha!
Yangidan yangi retseptlarni bizdan kutib qoling va bizning telegram kanalimizga albatta a'zo bo'ling.
